Daniel 2

Nebukadnesara ena nihi

1Nebukadnesara ena lohia laḡania iharuana ai, Nebukadnesara e nihi; bena lalona na e hekwarahiva bona se mahutava. 2Bena hanua pavapavana na e hahedua, mea taudia bona babalau taudia bona rohe taudia bona Kaldeataudia na bae boiridia, hanua pavapavana ena nihi bae herevalai henia. Taunabunai, idia na e raka vareai, hanua pavapavana vairanai e gini.

3Bena hanua pavapavana ese e hamaorodia, eto, Na nihi, bena laloguna e hekwarahimu, nihi baina dibaia na tomamu. 4Bena Kaldea taudia ese hanua pavapavana e hamaoroa, eto, Pavapava e, ba mauri hanaihanai! Emu hesiai taudia na nihi ba hamaorolaimai, bena ai ese anina baia gwauria.

5Bena hanua pavapavana ese Kaldea taudia e haere henidia, eto, Na hamaoromui momokanimu, nihi bona anina danu basio hamaorolaigu, vada bae daremui patapata bona emui ruma bae ḡiḡidia dobi. 6A nihi bona anina vada ba hahedinarai, bena lauegu amo harihari ḡaudia bona dava namodia bona dagi badadia baina henimui. Taunabunai, nihi bona anina danu ba hadibalaigu. 7Idia ese nega iharuana ma e haere, eto, Hanua pavapavana ese ena hesiai taudia na nihi baine hadibalaimai, bena ai ese anina baia gwauria.

8Hanua pavapavana ma e haere, eto, Lau dibagu momokani umui na o halahemu, badina be vada o diba egu hereva na momokani, 9nihi na basioma hadibalaigu davamui baine tamona mo. Vada o henega bou, hereva koikoidia bona dikadia lau vairagu ai ba gwaurai, ela bona nega ta. Taunabunai, nihi vada ba hamaorolaigu, bena baina diba umui na anina danu ba hamaorolaigu diba. 10Bena Kaldea taudia ese hanua pavapavana e haere henia, eto, Asi tauna ta tanobada ai ese hanua pavapavana ena hahedua baine badinaia diba; badina be asi hanua pavapavana badana bona mai siahuna ta ese ḡau unuhetomana vada e tahua, mea tauna ta eiava babalau tauna ta eiava Kaldea tauna ta enai. 11Hanua pavapavana ese e tahuamu ḡauna na auka herea; tau ta ese hanua pavapavima basine hamaorolaia diba, a dirava haida ese. A unu dirava na taunimanima dekediai asie nohomu.

12Una hereva dainai hanua pavapavana na e badu, lalona na e ḡaraḡara herea, bena e haheḡani aonega taudia iboudiai Babulono ai na bae aladia ore. 13Taunabunai, hahedua herevana e siaia lao, aonega taudia na bae aladia mase; bena Daniel mai bamona ida danu e tahudia, bae aladia mase totona. 14Bena Daniel ese ena hereva nahuana e tohoa, bena mai lalo-pararana ida Ariok, hanua pavapavana ena hegima oreana biaguna, aonega taudia Babulono ai iala-masedia totona ela tauna, na e haere henia. 15Ia ese Ariok, hanua pavapavana ena tuari lohiana, e nanadaia, eto, Badina be dahaka hanua pavapavana ena hahedua na auka herea? Bena Ariok ese una kara na Daniel e hamaorolaia. 16Bena Daniel na e raka vareai, hanua pavapavana e noia, nega ta baine gwaurai henia, nihi anina na hanua pavapavana baine hamaorolaia helaoreana.

17Bena Daniel na ena ruma ela, una kara na ia bamona lIanania bona Misael bona Asaria e hamaorolaidh, 18bena e hamaorodia danu, guba Duavana ena hebogahisi bae tahua, una ḡau hehunina dainai, Daniel mai bamona ida na aonega taudia Babulono ai oredia ida basie mase bou helaoreana. 19Bena una ḡau hehunina na Daniel enai e hedinarai, hanuaboi mata-hanaina lalonai. Bena Daniel ese guba Duavana e hanamoa. 20Daniel eto,

Dirava ladana bae hanamoa ela bona hanaihanai;
aonega bona goada na ienai.
21Ia ese nega bona nega hetoadia e ha-idaudiamu;
ia ese hanua pavapavadia e abidia ohomu bona e haginidiamu;
ia ese aonega taudia na aonega e henidiamu,
bona lalo-parara taudia na lalo-parara e henidiamu.
22Ia ese ḡau dobudia bona ḡau hehunidia e hahedinaraidiamu;
dibura ai e miamu ḡaudia na ia dibana,
diari na ienai e miamu.
23Senegu edia Dirava e,
lau na hanamomumu, na imodaimumu;
badina be oi ese aonega bona goada vada o henigu,
bona ai ese a noimu ḡauna na vada o hadibalaigu;
badina be hanua pavapavana enai e vara karana na
vada o hadibalaimai.
24Taunabutlai Daniel na Ariok, hanua pavapavana ese aor!ega taudia Babulono ai iala-masedia e duanaia tauna, dekenai e raka vareai. Ela, e hereva henia, eto, Aonega taudia Babulono ai basio aladia mase; lau ba hakaugu vareai hanua pavapavana vairanai, bena lau ese hanua pavapavana ena nihi anina baina hamaorolaia.

25Bena Ariok ese Daniel e hakaua vareai haraḡa, hanua pavapavana vairanai, e hamaoroa, eto, Iuda amo e mailaidia bena iniseni ai e hanohodia taudia bogaragidiai tau ta vada na davaria, ia ese nihi anina na hanua pavapavana baine hamaorolaimu diba. 26Bena hanua pavapavana ese Daniel, ladana ta be Beletesasara, e nanadaia, eto, Egu nihi bona anina danu ba hamaorolaigu diba eiava? 27Daniel ese hanua pavapavana e haere henia, eto, Aonega taudia eiava babalau taudia eiava mea taudia eiava hisiu toadia mai dibadia taudia ta ese hari ḡau hehunina, hanua pavapavana ese vada e nanadailaia ḡauna, na hanua pavapavana basine hamaorolaia diba. 28A ḡau hehunidia e hahedinaraidiamu Diravana na guba ai; ia ese dina gabedia ai bae vara ḡaudia na oi King Nebukadnesara vada e haheitalaimu. Emu nihi, bona mata-hanai ḡaudia kwaramu ai e hedinarai, emu mahuta patana latanal o hekureva negana ai, ḡaudia bini. 29Pavapava e, emu mahuta patana latanai o hekureva negana ai, lalo-hadai haida na emu ai e kau, nega gabedia ai bae vara ḡaudia o lalo hadailai; bona ḡau hehunidia e hahedinaraidiamu Diravana ese bae vara ḡaudia na e hadibalaimu. 30A ina ḡau hehunina na egu ai vada e hahedinaraia, dia egu aonega ese mauri taudia iboudiai edia aonega na e hereadiamu dainai, to anina na hanua pavapavana baina hadibalaimu bona oi sibomu emu lalo-hadai ba dibadia helaoreana.

31Pavapava e, kaivakuku badana ta o itaia. Una kaivakuku bada-hereana bona kiamakiama-hereana na oi vairamu ai e gini, ita-itana na mai garina. 32Una kaivakuku kwarana nagold namo-hereana, kemena bona imana nasilver , bogana bona koekoena na auri labora-labora, 33bona aena na auri. Aena palapaladia na taidia auri bona taidia raro. 34Bena o raraia negana ai, nadi ta vada e heutu oho, a d;a taunimanima imana ese; bena una nadi ese una kaivakuku aena palapaladia, auri bona raro gaudia, ai e tubu, e hamakohidia rohoroho. 35Bena auri, raro, auri labora-labora,silver ,gold , iboudiai na e makohi sisisisi, taboro negana ai uit e kwadiamu gabuna momorudia na heheto; bena lai ese e hodadia oho, sidia taidia asie davaridia diba. A hari kaivakuku ai e tubu nadina na ororo badana ai ela, tanobada idoinai e hahonua.

36Nihi na bunai. Harihari ai ese ia anina na hanua pavapavana baia hamaorolaimu. 37Pavapava e, oi na pavapava edia pavapava; guba Diravana ese basileia bona siahu bona goada bona hairai na oi vada e henimu; 38bona taunimanima natudia bona uda boromadia bona atai manudia, edeseni ai edeseni ai e nohomu, na oi imamu ai vada e atodia bona iboudiai biagudia ai vada e halaomu: oi na hari kwara,gold ḡauna. 39Oi murimu ai basileia ta ma baine gini, a dia oiemu heḡereḡerena; ma ia murinai ihatoina, auri labora-labora ḡauna; ia ese tanobada idoinai baine lohiaia. 40Bena basileia ihahanina baine gini, mai goadana auri na heto; badina be auri ese ḡau iboudiai e hamakohidia sisisisimu bona e huaridia patapatamu; bena e hahemakohimu aurina na heto ia ese ini iboudiai baine hamakohidia bona baine taodia pata. 41Ina danu, hari ae palapaladia bona ae kwakikwakidia o itadia, taidia na uro ikarana tauna ena raro bona taidia na auri, heḡereḡerena ai una basileia baine haheparara; a ia lalonai auri ena auka taina baine mia, hari auri o itaia, raro manoka-manokana ida e hebulo, na heto. 42Bona hari ae kwakikwakidia taidia na auri bona taidia na raro manoka-manokana heḡereḡerena ai, una basileia kahana baine goada bona kahana baine makohi kava. 43Bona auri o itaia, ia na raro manoka-manokana ida e hebulo, heḡereḡerena ai idia na bae headava hedoa-hedoa, a basie hahetamona, auri bona raro e hebulomu ai asie hahetamonamu na heto. 44Unu pavapava edia nega ai guba Diravana ese basileia ta baine haginia, nega ta ai basie habuaia tari diba ḡauna; bena ena lohia siahuna na basine hanai bese idauna ta enai. Ia ese unu basileia iboudiai na baine hamakohidia sisisisi bona baine hadokodia, bena baine gini hanaihanai. 45Nadi ta o itaia heḡereḡerena, ororo amo e heutu oho, a dia taunimanima imana ese; bena una nadi ese auri, auri labora-labora, raro,silver bonagold na e hamakohi sisisisi. Dirava badana ta ese nega gabena ai bae vara ḡaudia na hanua pavapavana vada e hadibalaimu. Nihi na momokani, bona anina na momokani. 46Bena King Nebukadnesara na tano ai e goru diho, Daniel e toma henia diho, bena e hahegani, boubou ḡauna bona muramura mai bonana na bae hahelaḡaia iena. 47Hanua pavapavana ese Daniel e hereva henia, eto, Momokani, emu Dirava na dirava edia Dirava bona pavapava edia Lohia, bona ḡau hehunidia ihahedinaraidia Diravana; badina be oi ese ina ḡau hehunina ihahedinaraina vada o diba. 48Bena hanua pavapavana ese Daniel na dagi badadia bona herahia badadia ḡaudia momo herea e henia; bona Babulono tanona idoinai lohiana ai bona aonega taudia iboudiai Babulono ai biagudia ai e halaoa. 49Bena Daniel ese hanua pavapavana e noia; bena ia ese Sadaraka bona Mesaka bona Abedenego e duanaidia, Babulono tanona bae biagua; a Daniel na hanua pavapavana ena ruma ai e nohova.